ភ្នំពេញ៖ គណបក្សចំនួន៥ បានប្រកាសគាំទ្រនូវប្រសាសន៍របស់ សម្តេចតេជោ ហ៊ុន សែន នាយករដ្ឋមន្រ្តីកម្ពុជា កាលពីថ្ងៃទី២៦ ខែកក្កដា ឆ្នាំ២០២៣ បានប្រកាសជាសាធារណៈលាលែងពីតំណែងនាយករដ្ឋមន្ត្រី ដោយបានផ្តល់នូវសេចក្តីទុកចិត្ត បានផ្ទេរតំណែងជូនទៅឱ្យលោក ហ៊ុន ម៉ាណែត ជានាយករដ្ឋមន្ត្រី ក្នុងនីតិកាលទី៧ នៃរដ្ឋសភាជាតិ។

ញត្តិគាំទ្ររបស់គណបក្សខ្មែរតែមួយនៅថ្ងៃទី២៨ ខែកក្កដា ឆ្នាំ២០២៣ បានឱ្យដឹងថា គណបក្សខ្មែរតែមួយមានជំនឿចំពោះ លោក ហ៊ុន ម៉ាណែត នឹងក្លាយជានាយករដ្ឋមន្តី្រថ្មីនៃព្រះរាជាណាចក្រកម្ពុជាដ៏ខ្លីខាងមុខនេះ មានឧត្តមគតិថ្មី របៀបដឹកនាំថ្មី ដើម្បីភាពជាម្ចាស់លើមាតុភូមិ កម្ពុជា និងការបង្កើតពុម្ពលទ្ធិប្រជាធិបតេយ្យបែបខ្មែរនិយមមួយ ដើម្បីលុបបំបាត់ចោលនូវវប្បធម៌លទ្ធិប្រជាធិបតេយ្យបរទេសជ្រុលនិយមនៅពីក្រោយខ្នងក្រុមគណបក្សជ្រុលនិយមនៅកម្ពុជា។

ជាមួយគ្នានេះ គណបក្សធម្មាធិបតេយ្យ និងគណបក្សកសិករ បានប្រកាសគាំទ្រទាំងស្រុងចំពោះ លោក ហ៊ុន ម៉ាណែត សម្រាប់កាន់តួនាទីជា នាយករដ្ឋមន្ត្រី នៃនីតិកាលទី៧ ដើម្បីដឹកនាំរាជរដ្ឋាភិបាលកម្ពុជាអាណត្តិថ្មី បន្តការកសាងអភិវឌ្ឍជាតិ ការពារសន្តិសុខជាតិ សន្តិភាព ប្រជាធិបតេយ្យ ការគោរពសិទ្ធិមនុស្ស ធ្វើឱ្យសេដ្ឋកិច្ចជាតិរឹងមាំ ប្រជាជនរស់នៅមានជីវភាពធូរធារកាន់តែល្អប្រសើរឡើងតរៀងទៅ។

ទន្ទឹមនោះ គណបក្សសញ្ជាតិកម្ពុជា ក៏បានប្រកាសគាំទ្រទាំងស្រុងនូវសារនយោបាយរបស់ សម្ដេចតេជោ ហ៊ុន សែន ក្នុងការរៀបចំសេណារីយោថ្មី ដើម្បីឱ្យលោក ហ៊ុន ម៉ាណែត ជានាយករដ្ឋមន្ត្រីបន្តវេនសម្រាប់នីតិកាលទី៧នៃរដ្ឋសភា។

គណបក្សសញ្ជាតិកម្ពុជាយល់ឃើញថាការផ្លាស់ប្ដូរនេះ ជាការលះបង់ដ៏ធំធេងបំផុតក្នុងឆាកជីវិត នយោបាយរបស់សម្តេចតេជោ ហើយសេណារីយោថ្មីនេះ ស្របតាមរដ្ឋធម្មនុញ្ញនៃកម្ពុជា និងស្របតាមឆន្ទះរបស់ប្រជារាស្ត្រជាម្ចាស់ឆ្នោតហើយលោក ហ៊ុន ម៉ាណែត ជាធនធានមួយ ប្រកបដោយសមត្ថភាពនិងស័ក្តិសមជាទីបំផុតសម្រាប់តំណែងកំពូលមួយនេះ។

មិនខុសពីគណបក្សផ្សេង គណបក្សកម្លាំងប្រជាធិបតេយ្យក៏បានប្រកាសគាំទ្រទាំងស្រុងចំពោះ លោក ហ៊ុន ម៉ាណែត ជានាយករដ្ឋមន្ត្រី ដើម្បីដឹកនាំរាជរដ្ឋាភិបាលកម្ពុជាអាណត្តិថ្មី បន្តការអភិវឌ្ឍន៍ជាតិ និងការពារ សន្តិភាពឱ្យបានរឹងមាំប្រកបទៅដោយលទ្ធិប្រជាធិបតេយ្យ ដើម្បីធ្វើឱ្យសេដ្ឋកិច្ចជាតិកាន់តែរីកចម្រើន ការរស់នៅរបស់ប្រជា ពលរដ្ឋទទួលបានការគោរពសិទ្ធិគ្នា និងមានជីវភាពកាន់តែធូធារល្អប្រសើរឡើងថែមទៀត។

គណបក្សកម្លាំងប្រជាធិបតេយ្យបានគូសបញ្ជាក់ថា ការចាញ់ឈ្នះនៅក្នុងពេលប្រកួតប្រជែងជារឿងមួយសម្រាប់បទពិសោធន៍នៅអាណត្តិក្រោយ អ្វីដែលសំខាន់នោះគឺការចេះទទួលស្គាល់ចំពោះលទ្ធផល និងចេះគាំទ្រចំពោះអ្នកទទួលបានជ័យជំនះដើម្បីដឹកនាំប្រទេសបន្តទៅមុខទៀត៕